వర్షాకాలం పర్యాటకులను విశేషంగా ఆకర్షిస్తున్న విశాఖ మన్యం లోని ప్రముఖ జలపాతాలు పర్యాటక కేంద్రాలు

ఆంధ్రప్రదేశ్ రాష్ట్రంలోని విశాఖ ఏజెన్సీ ప్రాంతాలు పచ్చని ప్రకృతి సోయగాలతో పర్యాటకులను కట్టిపడేస్తున్నాయి. ఇటీవలి వర్షాల కారణంగా మన్యంలోని వాగులు, వంకలు నిండుగా ప్రవహిస్తూ కొండకోనలను మరింత రమణీయంగా మార్చాయి. అరకు లోయ, లంబసింగి, కటికి జలపాతం తదితర ప్రాంతాలకు పొరుగు రాష్ట్రాల నుంచి పెద్ద ఎత్తున పర్యాటకులు తరలివస్తున్నారు. పచ్చటి కొండల నడుమ నుంచి జాలువారుతున్న జలపాతాల వద్ద సందర్శకులు ఉల్లాసంగా గడుపుతున్నారు. పర్యాటకుల రద్దీ పెరగడంతో స్థానిక హోటళ్ళు, హోమ్‌స్టేలు పూర్తిగా నిండిపోయాయి. పర్యాటక రంగానికి ఊతం లభించడంతో పాటు గిరిజన ప్రాంతాల ప్రజలకు, చిరు వ్యాపారులకు మెరుగైన జీవనోపాధి లభిస్తోంది. ప్రమాదకర ప్రాంతాల్లో పర్యాటకులు జాగ్రత్తలు పాటించాలని అధికారులు హెచ్చరిక బోర్డులు ఏర్పాటు చేశారు. రక్షణ చర్యలను పర్యవేక్షించేందుకు ప్రత్యేక సిబ్బందిని ఘాట్ రోడ్లలో మోహరించారు.