అమెరికాలో విదేశీ ఉద్యోగుల విషయంలో మరో కీలక పరిణామం చోటుచేసుకుంది. ఇప్పటివరకు ప్రధానంగా H-1B వీసా కార్యక్రమంపై దృష్టి పెట్టిన ట్రంప్‌ ప్రభుత్వం.. తాజాగా ఉద్యోగ ఆధారిత గ్రీన్కార్డ్ ప్రక్రియపైనా చర్యలు ప్రారంభించింది. మైక్రోసాఫ్ట్, అడోబ్‌తో పాటు ఇన్ఫోసిస్, టాటా, విప్రో, హెచ్‌సీఎల్, కాగ్నిజెంట్, క్యాప్‌జెమినీ సంస్థలను PERM కార్యక్రమం నుంచి సస్పెండ్ చేసింది.
ఈ సంస్థలకు సంబంధించిన కొత్త PERM దరఖాస్తులను స్వీకరించబోమని, ఇప్పటికే పెండింగ్‌లో ఉన్న దరఖాస్తులను కూడా ప్రాసెస్ చేయబోమని అమెరికా కార్మిక శాఖ ప్రకటించింది. విదేశీ ఉద్యోగులను శాశ్వత నివాసం కోసం స్పాన్సర్ చేయడంలో PERM కీలకమైన దశ కావడంతో తాజా నిర్ణయం ప్రాధాన్యం సంతరించుకుంది.
H-1B తర్వాత PERMపై దృష్టి
అమెరికాలో నైపుణ్య ఉద్యోగాల్లో పనిచేసేందుకు విదేశీయులకు H-1B వీసా ఇస్తారు. అదే ఉద్యోగి తర్వాత అమెరికాలోనే శాశ్వతంగా ఉండేందుకు గ్రీన్కార్డ్ కోసం కంపెనీ స్పాన్సర్ చేయాల్సి ఉంటుంది.
చాలా ఉద్యోగ ఆధారిత గ్రీన్కార్డ్ కేసుల్లో ఆ ప్రక్రియకు ముందు PERM లేబర్ సర్టిఫికేషన్ అవసరం.
ఒక ఉద్యోగానికి తగిన అమెరికన్ కార్మికుడు అందుబాటులో లేడని, విదేశీ ఉద్యోగిని నియమించడం వల్ల అమెరికా ఉద్యోగుల వేతనాలు, పని పరిస్థితులు లేదా ఉద్యోగ అవకాశాలపై ప్రతికూల ప్రభావం ఉండదని కంపెనీ నిరూపించాల్సి ఉంటుంది.
అమెరికా కార్మిక శాఖ తాజా చర్యతో సస్పెండ్ చేసిన సంస్థలకు ఈ దశలో కొత్త దరఖాస్తులు దాఖలు చేయడం, పెండింగ్‌ దరఖాస్తులను ముందుకు తీసుకెళ్లడం నిలిచిపోయింది.
‘అమెరికన్ ఉద్యోగాలకే ప్రాధాన్యం’
విదేశీ ఉద్యోగుల కార్యక్రమాల్లో మోసాలు, నిబంధనల ఉల్లంఘనలు జరుగుతున్నాయన్న ఆరోపణలపై దర్యాప్తులు కొనసాగుతున్నాయని అమెరికా అధికారులు తెలిపారు.
మైక్రోసాఫ్ట్ విషయంలో కంపెనీ అమెరికన్ ఉద్యోగులను తొలగించిన సమయంలోనే విదేశీ ఉద్యోగుల కోసం H-1B, PERM ప్రక్రియలను ఉపయోగించిందని ఉపాధ్యక్షుడు జేడీ వాన్స్ ఆరోపించారు. ఈ ఆరోపణలను ప్రభుత్వం తన చర్యకు కారణాల్లో ఒకటిగా పేర్కొంది.
అయితే ఆయా కంపెనీలపై ప్రభుత్వం చేసిన ఆరోపణలు ఆరోపణలుగానే ఉన్నాయి. దర్యాప్తుల తుది ఫలితాలు ఇంకా వెలువడాల్సి ఉంది.
భారతీయ ఐటీ కంపెనీలకూ దెబ్బ
తాజా జాబితాలో ఇన్ఫోసిస్, టాటా, విప్రో, హెచ్‌సీఎల్, కాగ్నిజెంట్ వంటి కంపెనీలు ఉండటం భారతీయ టెక్‌ నిపుణుల దృష్టిని ఆకర్షించింది.
ఈ సంస్థలు అమెరికాలో పెద్ద సంఖ్యలో విదేశీ నిపుణులను నియమించుకుంటున్నాయి. ముఖ్యంగా H-1B కార్యక్రమంలో భారతీయుల వాటా అధికంగా ఉండటంతో.. ఈ సంస్థల PERM ప్రక్రియపై ఆంక్షలు గ్రీన్కార్డ్ కోసం ఎదురుచూస్తున్న ఉద్యోగులకు సంబంధించిన అంశంగా మారింది.
అయితే తాజా చర్యతో H-1B వీసాలు రద్దు కావు. PERM, H-1B రెండూ వేర్వేరు ఇమ్మిగ్రేషన్‌ ప్రక్రియలు. ప్రస్తుతం H-1Bపై పనిచేస్తున్న ఉద్యోగి వెంటనే తన వీసా హోదాను కోల్పోయినట్లు కాదు.
గ్రీన్కార్డ్ దారిలో జాప్యం
PERM దశలో ఉన్న ఉద్యోగులకు మాత్రం తాజా పరిణామం కీలకం.
ఒక ఉద్యోగి H-1Bపై అమెరికాలో పనిచేస్తూ.. సంస్థ ద్వారా గ్రీన్కార్డ్ ప్రక్రియను ప్రారంభించినట్లయితే PERM దశ ముందుకు సాగకపోవడం వల్ల తదుపరి దశలకు వెళ్లడం ఆలస్యం కావచ్చు.
ఇప్పటికే PERM దాఖలు చేసిన వారి దరఖాస్తులు కూడా ప్రాసెస్ చేయబోమని కార్మిక శాఖ ప్రకటించడంతో పెండింగ్‌ కేసుల పరిస్థితిపై కూడా స్పష్టత రావాల్సి ఉంది.
విశ్వవిద్యాలయాలపైనా దర్యాప్తు
విదేశీ ఉద్యోగుల అంశంతో పాటు అంతర్జాతీయ విద్యార్థుల విషయంలోనూ అమెరికా ప్రభుత్వం చర్యలు ప్రకటించింది.
హార్వర్డ్, యేల్, స్టాన్‌ఫర్డ్‌ సహా తొమ్మిది ప్రముఖ విశ్వవిద్యాలయాలపై J-1 ఎక్స్ఛేంజ్‌ విజిటర్‌ వీసా కార్యక్రమం దుర్వినియోగం జరిగిందన్న ఆరోపణలపై దర్యాప్తు చేయనున్నట్లు అధికారులు తెలిపారు. విదేశీ విద్యార్థులను ఉపయోగించి అమెరికా వేతనాలను తగ్గించే విధంగా కార్యక్రమాలను ఉపయోగించారా? అనే అంశాన్ని పరిశీలిస్తున్నట్లు వెల్లడించారు.
వరుస చర్యలు
H-1B కార్యక్రమంపై గతంలోనే అమెరికా ప్రభుత్వం పలు ఆంక్షలు, పరిశీలనలు చేపట్టింది. ఇప్పుడు PERM, గ్రీన్కార్డ్ ప్రక్రియలపైనా దృష్టి పెట్టింది.
ఒకవైపు H-1B ద్వారా విదేశీ నిపుణుల నియామకంపై పరిశీలన.. మరోవైపు PERM ద్వారా శాశ్వత నివాసం పొందే మార్గంపై ఆంక్షలు.. తాజాగా అంతర్జాతీయ విద్యార్థుల J-1 కార్యక్రమాలపైనా దర్యాప్తులు.. ఇలా విదేశీ నిపుణులు, విద్యార్థులకు సంబంధించిన పలు వీసా కార్యక్రమాలపై అమెరికా ప్రభుత్వం దృష్టి సారించింది.
